‘बाहुबली द कन्क्लुजन’ले चार दिनमा १ सय ६८ करोडको व्यापार

२ सय ७० करोडको लगानीमा बनेको सिनेमा ‘बाहुबली द कन्क्लुजन’ले हजार करोड क्लबको सुरुवात गर्ने संकेत देखाएको छ । सिनेमाले सुरुवाती चार दिनमै ५ सय २१ करोड ९८ लाखको ग्रश कलेक्शन गर्दै कम समयमा सबैभन्दा धेरै कमाउने सिनेमाका रेकर्ड राखेको छ । सिनेमाको चार दिनको कमाईबाट निर्माताहरुले ३ सय ३ करोड पाउने भएका छन् । 

चार दिनमा भारतमा मात्रै ३ सय ९० र भारत बाहिर १ सय ३१ करोडको ग्रश कलेक्शन गरेको जानकारी रमेश बालाले दिएका छन् । बलिवुडका ठूला स्टारका सिनेमाको कमाईलाई पनि फ्लप खुवाउँदै हिन्दी भाषामा सिनेमाले सुरुवाती चार दिनमा १ सय ६८ करोडको व्यापार गरेको छ । पहिलो दिन ४१ करोड, दोस्रो दिन ४० करोड, तेस्रो दिन ४६ करोड ५० लाख, र चौथो दिन ४० करोड २५ लाख गरी सुरुवाती चार दिनमा हिन्दी भाषामा १ सय ६८ करोड २५ लाखको ग्रश कलेक्शन गरेको छ । सिनेमामा प्रभास, राम्या कृष्णन, तमन्ना भाटिया, अनुश्का शेट्टी, राणा दग्गुबाती लगायतको मुख्य भूमिका छ।